السحر القاتل

اسامة الحلاق قال ليهو: لالا.. مابعرفها بس قبل شوية كانت قاعدة مع عشة (ست الشاي) فوق البنبر ده مسافة طويلة وأنا جيت قعدت مخصوص عشان اتشمر.. وعملت داير اشرب شاي.. سلمت عليها.. ردت السلام.. قلت ليها انتي منتظرة زول؟ قالت لي: ايوة.. قلت ليها: طيب.. قعدتك دي شينة هنا.. خشي على الصالون جوة.. قالت لي: لو دخلت جوة كان جا مابعرف مكاني.. قلت ليها: ماعندك ليهو تلفون؟ قالت لي: تلفونو قفل قبل شوية.. المهم بعد شوية جاها زولها وساقها مشا بيها هناك.. لكن والله دامة زي الدامة.. عوض قال ليهو: ماكان معاها بت تاني؟ قال ليهو: والله ياعوض ماشفت لي بت غيرها.. عوض ابا يقول ليهو دي بت خالي.. سكت ساي وقلبو ولع نار من جوة.. غيرة الرجل السوداني على عرضو.. وعارف لو قال ليهو دي بت خالي حيتحرج ويقعد يعتذر.. قال انسى.. عوض عدى قعدتو مع اسامة الحلاق ومشى.. واسامة لاحظ ليهو كل مرة يسرح.. صراحة عوض بقى مشغول بي موضوع سهام.. وباقي بين امرين.. يسكت ويستر البت عشان مايسبب مشكلة في البيت.. ولا يكلم ابوها ويخليهو في الصورة قبل الفاس ماتقع في الراس. لانو الخال وضعو الصحي لا يستحمل الصدمات القوية.. عوض كان محتاج لاي دليل يثبت بيهو تورط البت في علاقات غير سوية.. عشان يتصرف معاها.. لانو هسي بقى مشكك وبس.. والشكوك كبيرة شديد.. اخيرا خطرت ليهو فكرة عجيبة وغريبة.. طلع تلفونو وفتح الاسماء.. وطلع اسم صلاح حمد.. ده الزول الاتعرف عليهو في البص.. اتصل عليهو وداك رد.. ود الضريس؟؟ حبابك والله نورت الشاشة.. وين يازول؟ عوض قال ليهو: والله مقصر معاك.. المفروض اتصل عليك طوالي.. لكن والله خالي تعب تعب شديد.. وهسي أنا مدروش في السوق درش غريب.. صلاح قال ليهو: اها هسي ان شاء الله خالك ملك الصحة؟.. قال ليهو: والله لسه راقد.. واخيرا كمان ضربو سكري.. ده الكان ناقص.. اها دايرين نتلاقى ياخي.. يا تجيني يا اجيك.. بس شوف الكويس معاك.. صلاح قال: تعال لي انت.. والله يكون لي الشرف.. وتاني أنا بجيك.. عوض قال ليهو: كويس وصف لي البيت.. ووريني أجيك متين.. قال ليهو: طيب بتعرف مارنجان عووضة كويس؟. قال ليهو: بعرفها.. قال ليهو: شفت جامع انصار السنة؟ جوارو طوالي في مدرسة اساس قدامها نادي اسمو نادي الحي الغربي.. البيوت البعد النادي ده تسأل اي زول لاف تقول ليهو داير بيت ناس صلاح فرتاق.. بتكون وصلت.. قال ليهو: يازول باكر بتغدى معاك تب.. قال ليهو: حبابك والله ياعوض.. تشرف والله.. مرحب مرحب.. طيب في امان الله في امان الله وقفل التلفون.. بس الظاهر انو عوض عندو هدف كبير من الزيارة دي والتواصل ده.. مع انو هو زول هاوي تواصل لكن دي براها.. المهم جاء راجع البيت.. وبقى يعاين لي سهام اتنين اتنين.. وكاجيها كجة.. شايفها قبيل غشت عليهو.. وهي بتعاين ليهو والخوف ظاهر في عيونها.. خايفة انو يكلم ابوها.. لكن عوض زول صميم.. وزول مواقف.. سكت ساي.. لكن بعاين ليها معاينة حقارة وما اتكلم معاها اصلو.. بس في حاجة.. امها فهيمة مرة لبقة وفهيمة فعلاً ونقاشة.. لاحظت للنظرات المتكررة من عوض لسهام.. ولاحظت لارتباك سهام.. انفردت بيها وقالت ليها: انتي يا سهام.. عوض ده بعاين ليك كدي مالو..؟ قهرتو بي الله يا يمة.. أنا باقي بخاف من العين.. قالت ليها: مافي شي يا امي.. انتي مالك بتتوهمي كدا؟؟ عوض طيب وحنين.. ومرات بعاين في حتة وبكون بالو في حتة تانية.. انتي بدل ما تعطفي عليهو.. هو جاي عشان يساعد ابوي تقعدي تقولي قهرتو بي الله؟ غايتو انتي يا امي مشكتك مستعصية.. وسهام بتدافع عن عوض..وفهيمة تعاين ليها وتتبسم.. وهي ماعارفه انو سهام بقت متضايقة من مجرد وجود عوض معاهم.. لانو بقى مسبب ليها هاجس ومخاوف.. وهي ماعارفة المصيبة الماشة عليها.. وبكرة تتكشف الحقايق ويبين المستور.. اها بكرة اليوم الموعود مع الود صلاح.. عوض مشى السوق وجهز الفول ونزل طاولات العيش.. وبقى شغال بي مزاج ويصفر في اغنية الكاشف البتقول.. يا حبيبي قلبي حاب.. رحلة بين طيات السحاب.. وببيع بي سرعة.. كف كف.. ويتونس مع ده ويهظر مع ده.. مشغل معاهو ولد من اولاد مايو 40.. ولي متين يخلص من البرنامج ده عشان يمشي لي صلاح فرتاق.. انتهى زي الساعة 12 الا شوية كدا.. وقعد يكسر في الزمن لامن صلى الضهر وركب مشى.. وصل لي بيت ناس صلاح على حسب الوصف.. صلاح زول مشهور اي زول بعرفو.. اها يا زول صلاح والله راجل ضو قبيلة.. وصباح خير.. رحب بي عوض ترحيب اهلو الاصليين.. وفرح بيهو فرحة ظهرت فوق وشو.. قعدو اتونسو شوية كدي.. وجابو الصينية الما خمج.. واتغدو فضلة خيركم.. وحلو وشربو الشاي.. والونسة والضحك ماخلو نكتة مساطيل ماقالوها.. حتى حكو النكتة المسطول الطلع الصالون وفرا جانحيهو.. وجا ناطي من راس الصالون.. قايل نفسو صقر.. وكت بقى في نص الهواء لقى الاجنحة بلا ريش وتاااخ دقه الدلجة ههههه.. صلاح كان معاهو اخوه الاصغر اسمو ايوب وواحد من الجيران صاحب اخوه.. بس الاربعة..المهم بعد شوية الاولاد الاتنين اتخارجو وفضلو صلاح وعوض الاتنين وبحكو لي بعض.. عوض قال ليهو: والله ياصلاح موش ده لقاءنا التاني يادوب؟.. والله التقول بعرفك قبال عشرين سنة.. ياخي والله اصحابي كلهم مافيهم زول ارتحت ليهو كدا ( ياربي المقدمة دي حقيقة وللا حنك ساي؟ ) صلاح قال ليهو: والله نفس الاحساس ياعوض.. ياخي ربنا يكرمك زي ما اكرمتنا بالجية دي.. عليك الله قلت لي كيف خالك السر؟؟.. قال ليهو: والله ياخي خالي السر غير المرض -المرض هين- هسي عندو مشكلة كبيرة وهو مو عارفها.. عارفها أنا وبس.. ومافي زول بقدر يحلها غيرك انت.. صلاح كان شايل الجك والكوز.. براحة ختاهن في الطربيزة وقعد براحة وقال ليهو: انا؟؟؟ والله اذا كانت في مقدرتي.. لو بي دمي احلها ليهو بس انت قول لي. عوض قال ليهو: عارفك راجل وود رجال وما بتخيب ظني.. عارف يا صلاح.. السر خالي عندو بتو في طور صعب وحرج جدا.. بتقرا في العالي ممتحنة.. وأنا خايف عليها شديد.. لانو السر زول درويش وطيب وبرئ.. وما بنتبه لي كتير من الحاجات.. والبت دي أنا ملاحظ عليها عدم اتزان.. وماعندي عليها بينة اقدر اثبتها عليها.. دايرك تتصرف بي طريقتك.. عن طريق واحدة من صاحباتها.. تعرف لي البت دي..وسلوكياتها وداسة علينا شنو لاني أنا مابقدر اعمل علاقة مع واحدة من صاحباتها.. صعبة شديد.. بس انت مابتعرفك.. وما ح تعرف انك بتعرفني.. صلاح قال ليهو: هي بتقرا في ياتو مدرسة؟ قال ليهو: بتقرا في المدرسة الفلانية.. قال ليهو: اقول ليك قولة؟؟ والله انت محظوظ حظ عجيب يا عوض وعلى حسب نية خالك.. أنا عندي اخت صاحبي.. بتقرا في نفس المدرسة دي.. وكمان خاتة عينها علي.. أنا اصلاً ماعندي ليها حاجة.. لكن حاظبط معاها العلاقة بس عشان الموضوع ده.. عوض قال ليهو: حلو شديد.. بس اهم حاجة تجيب اخبار سهام بالتفصيل.. وبتطلع ولا مابتطلع؟ ولو بتطلع بتطلع مع منو؟.. لو في اي زول مثبتها تجيب لي عنوانو بالكامل.. واسمو وانت طبعاً ح تكون بره الصورة.. والله يا صلاح أنا شدة الموضوع ماشاغلني ماقادر انوم بالليل كويس.. انت عارف الاعراض نحن بتعمل لينا قلاقل كيف.. صلاح قال ليهو: من هسي اطمن.. وخت في بطن بطيخة صيفية.. والله أنا اصعب من ناس المباحث المركزية.. وكمان موضوع بهمك انت.. أنا من باكر بتفرغ للموضوع ده.. قال ليهو: يازول على بركة الله وربنا يوفقك.. اول ما تجمع المعلومات المؤكدة.. تديني (الو) ونتلاقى.. قال ليهو: يازول اتفقنا.. وكملو كلامهم غايتو.. وعوض اتحرك مشى منو طوالي على البيت.. في البيت هناك كان في تحركات غريبة وعجيبة.. قبل عوض مايجي.. فهيمة قالت للسر: انت عارف يا السر.. أنا يتخيلي عوض ده داير بتك سهام.. قال ليها: عرفتي كيف يافهيمة الفهيمة؟؟ قالت ليهو: امبارح كان بعاين ليها معاينة غريبة خلاص.. وهي وكت تتلفت عليهو يقبل منها غادي.. وهي ترتعش وتبلع في ريقها.. وكت جيت سألتها.. قعدت تتكلم عنو كلام الحبايب والقرايب.. ده زول ممتاز.. وده زول حنين.. وجا يساعدنا.. وشنو وشنو.. أنا في راي يا السر تتكلم معاهو طوالي..عشان تكون على بينة.. قول ليهو رايك في سهام بتي دي شنو؟ السر قال ليها: انتي يا فهيمة ما نصيحة؟؟ كيف يعني اعرض عليهو بتي لي مجرد اوهامك؟؟.. هسي كان احرجني وقال لي ماعايزها.. أنا اودي وشي وين تاني؟؟ قالت ليهو: ولاشي يعني شنو؟.. على الاقل نكون اتاكدنا من الشكوك.. قال ليها: اذا ما مشكلة اسأليهو انتي.. واتاكدي من شكوكك أنا ماعندي شكوك.. قالت ليهو: والله الليلة.. أكان اتكلم معاهو واليحصل يحصل.. واللييييييلة ياعوض هههه

بقلم //طارق اللبيب