شعر سودانى

نحنا أولاد جعل أصحاب مكان ومهابة
واقفين في الحرب سكين قصاد دبابة
الكايس حنانا قلوبنا فاتحه أبوابا
والداير يجوطه بناكلو قانون غابة
،،،



الداير الغني يعمل حساب لي فقرو
كعب الضله كيف المتلي انته تحقرو ؟؟؟
ابسوميته خلي الليله سيدكم اعقرو
وين تاني الملاج وكتين يتلب صقرو
،،،


يا شيخ العرب جربت لحسه كوعك ؟؟؟؟
كل ما اوقرك في الشين اراك تتقدم
اتعكنن خلاااص انا صبري حصنو اتهدم
اصلو البينا ما بتنفكا من غير دم
الكاينه التكون بي وراها ما بتندم


اصلو الخمله ما بسمع نصيحه الهادي
اول خفنا ليك من البهادل هادي
يا طه البهدد ما بضرب الوادي
يمشو عليه الرجال يجري ويقبل غادي




إحنا أولاد جعل أهل المُلك بالأولى
وإحنا ملكنا معلوم خايلة فيه الصولة
وإحنا فارسنا بتختشيه الدولة
وإحنا الصاقعة كل الناس تقول لا حولَ
إحنا أهل السواقى البكُر واسوقها
نهدى الصافنات للضيف ركوب ويسوقها
إن ضرب النحاس إحنا بنشلع عوقها
القيمان نلاقيها والوفها نسوقها
إحنا الما بسمونا العريب وكلاته
وإحنا على ضهور الصافنات صلاته
طيعناها من دار برقو لى فلاتة
إحنا بندخل الألف إن بقينا تلاتة



المك نمر

أرباب دار جعل الفارس الارباب
وليك فى قلبى تقدير احترام وكتاب
لو كان شعرى فى مدحك نظمتو كتاب
تســتاهل عشان أرباب و ود أرباب
*** *** ***
نمراً بركــب الكـيك البطـر يتحـــرّن
نمراً بقــلب العــوق أب صفوفاً جرّن
خلوات صدرو في علوم الحروب كم قرّن
ســيفو بِينتـف الدرع الحديــدو مقــرّن
*** *** ***
مو نمر الشدر حاضن فروعو مقيّل
دا النمر البســد الصف محل مايميّل
كلما أقول شُـكر ألقــاهو فيـهو قِلـيل
كفــو بيخجـل العيــنة السـحابا منيّل
*** *** ***
الليلة نمــر صِبحن خيــولو يصهلن
من حر العلوق صبــحن قلوبـن بِهلن
دايرات مكبس الضحوي الفيهو يبهلن
*** *** ***
نمراً ما بفـز حاشـتاهو كلا وحاشا
لمام لي الهمائل البي العتامير طاشا
ذو عفة وثبات كرماً معاهو بشاشا
وتشـهد دار جعـل يوم حـرقة الباشا
*** *** **